Target sang Land Transportation Office Negros Island Region nga maedukar ang mga motorista sa bilog nga rehiyon antes magkuha sang driver’s license agud mapanubo ang numero sang road crashes.
Sa interview sang Bombo Radyo kay LTO NIR Regional Director Jeck Conlu, kalabanan nga nagaaksidente amo ang mga motorcycle rider ukon nagamaneho sang motorsiklo.
Kalabanan naman nga naaksidente ang wala sang driver’s license.
Ginapatuman sa karon ang LTO ON WHEELS kun sa diin nagagwa ang mga personnel sang Driver’s Education Center kag nagapartner sa mga local government units agud nga maghatag sang libre nga Theoretical Driving Course nga amo ang requirement sa pagkuha sang Student Permit.
Mas convenient ini sa mga luyag magkuha sang lisensya bangud indi na kinahanglan magkadto sa district office ukon magbayad sa mga driving school.
Suno kay Conlu, kinahanglan nga maedukar ang mga driver sang mga regulasyon sa dalan kag makalabay sa husto nga proseso sa pagkuha sang lisensya gani target nila nga mabisitahan ang tanan nga LGU sa NIR.
Aminado ang regional director nga motorcycle riders ang kalabanan nga nagakadakpan sa roadside inspections.
Suno kay Conlu, indi hungod nga nagamotor lang ang dakpon, kundi natabuan lang nga madamo ang nagamotor, madamo man sang nagakadisgrasya kag madamo ang violators.
Suno sa iya, ang pagdakop sa mga violators ang paagi agud nga masalbar sila sa aksidente.
Sa roadside inspection sang LTO, kalabanan nga violations amo ang pagmaneho nga wala sang OR-CR, wala sang driver’s license, wala sang helmet kag wala nagasuksok sang safety belt.
