Ginahulat nalang sang City Government sang Bacolod City ang mangin sabat sang director sang Department of Public Works and Highways (DPWH) Region 6 matapos nga magpadala sang sulat ang alkalde sa pagpangayo sang rekomendasyon agud mangin efficient ang function sang Diversion Channel sa Bacolod City.
Suno sa pahayag ni Bacolod City Mayor Greg Gasataya, sang tinalikdan nagpadala na sila sang sulat kag ginahulat nalang ang reply para sa rekomendasyon sang ahensya.
Madumduman nga sang tinalikdan ginbaha ang downtown area sa ciudad sang Bacolod kag sang gintsekyar sang City Engineers Office kag natukiban nga wala mabuksan maayo ang outfall ukon sluice gate sa diversion chanel.
Madumduman man nga ginpadali man ni Mayor Greg ang pagtakod sang sluice gate agud nga magamit na ang nasambit nga proyekto.
Isa sa mga gin-ayo sang alkalde sa DPWH-6 nga kun mahimo buksan lang anay ang sluice gate sa diversion chanel kag sirad-an lang kun may storm surge apang kun wala lang man pabay-an lang ini nga nakabukas agud nga indi na kinahanglan nga pagbantayan kada hapon kun mag-ulan.
Ang outfall sa diversion chanel ang guluwaan sang tanan nga drainages sa downtown area sang ciudad.
