Gin-issuehan sang citation ticket kag ginpabayad sang P1,000 ang isa ka Job Order (JO) worker matapos ini makuhaan litrato nga nagamaneho sang motorsiklo nga wala sang suksok nga helmet samtang ini ang naka-uniporme pa sa trabaho.
Suno kay Bacolod City Secretary to the Mayor Atty. Marty Go, gilayon nga ginpatawag ang nasambit nga JO kag ginpamangkot angot sa naglapta nga litrato online.
Suno kay Go, ginpahayag sang natungdan nga wala ini nakasuksok sang helmet bangud nga nagadali siya kag nagahingagaw sa pagsugat sang iya bata sa eskwelahan.
Ang nasambit nga job order nga na-assign sa Bacolod City legal enforcement team ang ginpatawag man ni City Legal Officer Atty. Karol Joseph Chiu kag ini ang ginhatagan sang sanction.
Matapos ginpatawag gin-issuehan ini sang citation ticket para sa traffic violation kag ginpabayad sang P1000.
Suno kay Atty. Go, padayon ang panawagan ni Mayor Greg Gasataya sa mga empleyado sang ciudad bangud sila ang nagapatuman sang layi sa ciudad nga dapat sila ang magsunod man kag mangin ehemplo sa pagsunod sang mga kasuguan.
Suno pa diri, indi justifiable ang rason nga nagadali sa pagsugat sang bata bangud ang realidad nag-drive ini sang motorsiklo nga wala sang helmet gani kinahanglan sini atubangon ang offense kag violation.
