Ginapa-monitor ni Ombudsman Jesus Crispin Remulla sa mga alkalde sa Pilipinas ang mga opisyal kag opisina nga nagatutok sa kontrata may angot sa garbage collection and waste management kasunod sang report nga may nagakatabo nga korapsyon.
Suno kay Remulla, may mga alkalde pareho nanday Metro Manila mayors Vico Sotto kag Joy Belmonte nga wala nagapasilabot sa proseso sang kontrata apang mas maayo nga mapasiguro nga indi imbolbado sa iregularidad ang mga opisina sa idalom sang ila liderato kaangay sang business processing kag licensing offices subong man sa naga isyu sang permits.
Una ginpabutyag ni Remulla nga ang mga kontrata sa pagkolekta sang basura kag waste management ang kalakip sa pinakadako nga ‘corruption-driven’ nga negosyo nga imbolbado ang mga alkalde sa syudad kag banwa sa nagkalain lain nga lugar sa Pilipinas.
Ginhangkat man ni Remulla ang publiko nga i-report kon may iregularidad ang isa ka local government office kag magpadala sang kopya sang reklamo sa Ombudsman.
