Ginklaro sang Assistant Regional Director sang Department of Health-Negros Island Region nga wala sang kamatuoran ang ginpalapta nga link sang ginapahayag medical assistance nga P30,000 paagi sa pagsend sa messenger.
Sa interview sang Bombo Radyo Bacolod kay Adrian Hort Ramos, nakita sini ang link sang medical assistance matapos nga siya ang ginsendan sang iya abyan nga empleyado man sang Negros Occidental Provincial Government agud nga hibaluon kun matuod ini.
Suno kay Ramos, ang link ang fraudulent bangud una ang website nga gingamit ang indi official website sang Department of Health kag ikaduha ang medical assistance fund sang ahensya ang makuha lamang sa accredited hospital, health care facilities kag paagi sa pagparehistro egov.ph.
Dugang pa sini nga ang punterya sang mga nagpalapta sang fraudulent link amo ang gin-anunsyar ni President Ferdinand Marcos Jr sa iya 5th State of the Nation Address (SONA) nga mahimo maka-avail sang medical assistance paagi sa pag-apply sa egov.ph application form.
Nagpagwa man ang Central Office sang DOH sang statement may kaangtanan sa fraudulent link nga ginapahayag nagahatag sang nasambit nga medical assistance.
Ginpasalamatan ni Ramos ang mga pumuluyo nga vigilante na.
Panugyan man sini sa nakabaton sang fraudulent link nga indi na pagpasa agud nga indi maglapta pa.
