Magasapol si Bacolod City Councilor Atty Dindo Ramos, chairperson sa Committee on Transportation sa Sangguniang Panlungsod bwas kay Land Transportation Franchising and Regulatory Board (LTFRB) Director Atty. Vigor Mendoza II.
Ini angot sa problema sa transport sector kun sa diin pila ka mga modernized jeepney operators ang gindagdagan na sang demand letters kag foreclosure notice sang mga bangko bangod sa wala mabayaran nga ammortization.
Sa interview sang Bombo Radyo Bacolod kay Ramos, magapadulong sa ciudad sang Bacolod bwas si Mendoza.
Samtang paathag sang konsehal nga wala pagid sang official communication sa Sangguniang Panlungsod ang mga nagkaproblema nga modernized jeepney operators bangod ang ila concern ang derekta nila nga ginpadala sa LTFRB Central Office kag Department of Transport (DOTr).
Suno kay Ramos, apisar nga wala napalab-ot sa ila ang concern, ini ang problema gihapon sang ciudad bangod apektado man ang riding public.
Nagpasar naman sila sang resolusyon nga nagahatag sang otoridad sa pagbyahe sang mga traditional jeepney units.
Pahanumdom lamang sini sa mga magabyahe nga dapat rehabilidated kag roadworthy ang mga units.
Sa paglantaw ni Ramos, may mismanagement sa bahin sang mga nagapadalagan sang kooperatiba ukon korporasyon.
Kun sa diin ang income lamang ang ila ginlantaw kag wala ginkonsiderar ang sweldo sa drivers kag konduktor, wala nakapain sang separation pay kag retirement benefits, kag bisan ang depreciation sang salakyan.
Pahanumdom sini nga sa pagdugay, naganubo ang value sang salakyan.
Kasubong man ang monthly amortization sa bangko, nga kaupod dapat sa mga obligasyon sang management sang kooperatiba kag korporasyon.
