Totally damaged ang isa ka balay matapos gintupok sang kalayo sa nagluntad nga sunog sa Sitio Sawmill, Barangay Guinhalaran, Silay City, kahapon.
Sa interview sang Bombo Radyo Bacolod kay Remy Emberga, residente sa nasambit nga lugar, sa iya nakuha nga impormasyon nagtuhaw ang kalayo sang nagbalik ang supply sang kuryente matapos ang brown-out.
Suno kay Emberga mahimo nga may nag-spark nga electrical wire.
Ginalantaw sini nga masobra isa ka oras antes nadeklarar ang fireout.
Dugang pa sini nga nakita man sini nga nabudlayan ang mga fire personnel sa pagsulod sa lugar apang nahimuan sang paagi agud nga mapalong ang kalayo kag wala naman naglaton sa iban nga balay.
Suno kay Lowell Laraga, tag-iya sang nasunog nga balay nagapati siya nga electrical wire ang ginsuguran sang kalayo.
Suno kay Laraga nga may nakakita nga nagakalayo na ang isa bahin sang ila puluy-an.
Suno diri, ginhingagaw pa nila nga palong ang kalayo apang madasig nga naglapta kag ginlamon ang bilog nga balay.
Wala naman sang may nasamaran sa insidente.
Nagapadayon pa ang imbestigasyon sang Silay City Fire Station sa nagtuga sang sunog.
Sa interview sang Bombo Radyo Bacolod kay Fire Superitendent Publio “Boboy” Plotenia, Silay City Fire Marshal, nabaton nila ang fire call alas 4:40 sang hapon, kag nadeklarar ang fireout alas 5:00 sang hapon kag isa lamang ka balay ang nasunog.
Suno kay Plotenia, wala man nabudlayan ang mga bumbero sa pagresponde bangud yara man sa dalan ang balay nga nasunog apang one way lang ang pasulod kag pagwa.
Nagpahanumdom si Plotenia sa mga pumuluyo nga mag-halong kag mangin alerto gid agud malikawan ang sunog sa tion sang tig-ululan.
Suno sa Fire Marshal, padayon pa nga gina-imbestigahan sang Silay City Fire Station ang insidente agud mahibalu-an ang gintunaan sang kalayo nga nagtuga sang sunog kag ang kabug-osan nga balor sang kahalitan.
Sa kaangot nga balita…Nagpasalig ang alkalde sang Silay City nga magahatag sang bulig ang Local Government Unit sa pamilya nga nasunugan sa Purok Sawmill, Barangay Guinhalaran kahapon sang hapon.
Sa interview sang Bombo Radyo Bacolod kay Silay City Mayor Joedith Gallego nga gikan ini sa Bacolod–Silay International Airport agud nga abi-abihon si Papal Nuncio Charles Brown nga magatambong sa Installation ni Bishop Louie Galbines bilang ika-pito nga Obispo sang Diocese of Bacolod sa San Sebastian Cathedral, nagdiretso gilayon sa lugar sang nasunugan.
Ginsiguro sang alkalde nga may matulugan ang pamilya nga nasunugan kag mahatagan sang nagapanguna nga kinahanglanon ang nasunugan.
Samtang nagpahanumdom man ini sa mga pumuluyo sang Silay City nga regular nga ipa-inspeksyon ang mga electrical wiring agud malikawan ang pagluntad sang sunog.
