Mas nagsangkad pa ang Ebola outbreak matapos ini naglab-ot sa ika-anum nga probinsya sa Democratic Republic of Congo.
May panibag-o nga na-record nga napatay sa bahin sang Bas-Uele, lugar nga wala pa sang reported nga kaso sang virus.
Ginkumpirmar ni Jean Kaseya, director general sang Africa Centres for Disease Control and Prevention, nga isa ka lalaki sa Buta, probinsya sang Bas-Uele ang napatay.
Suno diri, gikan ang lalaki sa probinsya sang Haut-Uele antes nagmasakit.
Nagpaandam si Kaseya nga posible maglapaw sa isa ka tuig ang outbreak kun indi gilayon matapna ang paglapta sini.
Suno pa diri, mahimo ini na ang mangin pinakadako nga Ebola outbreak sa bug-os nga kalibutan kag may posibilidad nga maglapta ang virus sa iban nga pungsod.
Santo naman sang World Health Organization (WHO), mas madasig ang paglapta sang ini nga outbreak kumpara sa mga nauna nga Ebola outbreak.
Madumduman nga nag-umpisa ini sa northeastern Ituri province.
Base sa datos sang gobyerno, nagdangat na sa 4,566 nga kaso ang na-record sa diin 2,128 diri ang napatay.
Ang outbreak ang tuga sang rare Bundibugyo strain sang Ebola virus, nga wala pa sang aprubado nga bakuna ukon treatment.
Ang Ebola ang isa ka tumalagsahon apang makalalaton nga balatian nga mahimo mapasa paagi sa bodily fluids ukon nakontamina nga lugar ukon pagkabutang, kaangay sang panapton ukon beddings.
