Nagpaandam ang Regional Director sa Land Transportation Franchising and Regulatory Board – Negros Island Region sa mga taxi operators nga nakakuha na sang fuel subsidy apang wala ginhatag sa mga drivers nga kun padayun nga magpakatig-a siya ang magapangita na sang legal remedies.
Madumduman nga pila sa mga taxi drivers nga nagdangop sa special payout sang fuel assistance gikan sa LTFRB Region 6 sa Ayala Capitol Central tinalikdan nga inadlaw, ang nakibot na lamang sang mahibaluan nga naclaim na sang operator ang ayuda para sa ila.
Ini bangod ang tseke ang nakapangalan sa operator gani ini lamang ang maka-encash.
Pahanumdom ni Llena nga una nga ginhatagan sang ayuda ang mga operator samtang pila ka adlaw lamang ang lang-at, ginhatag naman ang ayuda para sa mga drivers.
Aminado si Llena nga may ara sang mga operator nga ginbatun na ang fuel subsidy apang wala ginturn-over sa mga drivers.
Apelar sini nga ihatag na ang ayuda nga gintalana para sa drivers, apang kun padayun nga magpakatig-a, bilang isa ka abogado paandam ni Llena nga mahimo sini malagas ang mga nagalapas.
Sa pihak nga bahin, aminado man ini nga may mga drivers gid nga apisar nadala sa ginsumiter nga lista sang operator, wala gid malakip sa nahatagan sang ayuda.
Ini ang bunga naman sang kakulang sang budget.
Suno sa Regional Director, ginahikutar pa sini sa LTFRB National Office nga mahatagan ang mga taxi drivers nga wala malab-utan sang ayuda.
Pahanumdom man sini nga ang dole out ukon ayuda ang indi deretso, sa baylo ini ang ginahatag lamang nga prebilihiyo, gani ini ang nakadepende sa budget.
Wala man ini sang listahan sang mga drivers sa Negros Island Region bangod ang dokumento ang yara sa LTFRB Region 6 kag Region 7.
Nagapangayo ini sang pasaylo sa mga wala nalab-utan bangod sa indi perpekto nga programa.
