Gin-athag sang pamilya sang senior citizen sa banwa sang Binalbagan nga wala sang nagsugo sa ila nga tuwang-tuwangan agud dal-on sa orientation site sang Unified Package for Livelihood, Industry, Food, and Transport (UPLIFT) program sang Department of Social Welfare and Development (DSWD) ang tigulang agud maseguro nga makakuha sang ayuda.
Sa interview kay Rolly Paculanang, bata sang senior citizen, inisyatibo lamang nila nga tuwangan ang ila 77 anyos nga amay nga si Cresenciano Paculanang para masiguro nga makakuha sini ang ayuda, kag indi bangod ini ang polisa sang DSWD.
Paathag ni Paculanang, nga wala sila sang malain nga intensyon ukon wala nagakontra sa ahensya.
Ini matapos maglapta sa social media ang video nga ginasakay nila sa duyan ang tigulang kag ginatuwangan padulong sa opisina sang DSWD-Binalbagan.
Pahayag sini nga personal nila nga gindala ang tigulang agud mapamatud-an nga buhi ang benepisyaryo kag mapakita ang sitwasyon sini, agud maseguro nga ini ang makabaton sang UPLIFT cash assistance.
Dugang pa niya nga wala man sang malain nga intensyon ang iya bata nga nagkuha sang video.
