Magapatawag sang technical conference ang Environmental Management Bureau-Negros Island Region sa Agosto 18 upod sa Bacolod City officials, mga proponents sa old dumpsite sa Brgy Mandalagan, kag ang operator sa Bacolod City Sanitary Landfill nga International Solid Waste Integrated Management Specialists, Inc. (ISWIM).
Sa interview sang Bombo Radyo Bacolod kay EMB NIR Director Vicente Los Bañes, indi na kinahanglan pa sang permit sa pagtransport sang mga basura gikan sa old dumpsite sa Brgy Mandalagan padulong sa bag-o nga Bacolod Sanitary Landfill sa Brgy Felisa bangod ang ihaboy ang basura man sang ciudad.
Tun-an paman sang mga ini kun pila ka adlaw ang ilawig sang paghakot.
Samtang may ipatigayon man nga laborartory test agud matumod kun ano ang mga hazardous waste nga kaupod sa mga basura, ilabi na nga ini ang mixed garbage halin pa sa nagligad nga napulo ka tuig.
Gin-athag man ni Los Bañes nga Pebrero pa lamang sila ang nakapadala na sang sulat sa Office of the Mayor kay may series of meetings naman nga napatigayon angot sa problema.
Ini bangod nagapangayo sa ila sang bulig ang proponents ukon ang bag-o nga nakabakal sang duta kun paano madispose ang mga basura agud mapuslan na nila ang propedad.
Apang wala gilayon nasaylo ang mga basura bangod sa kahangawa nga masobrahan na ka puno ang Cell No 4 sang Sanitary Landfill.
Nahibaluan nga ginsarado na ang Cell No 4 sa kahangawa nga ini ang magcollapse kun dugangan pa, samtang ginbuksan na ang Cell No 5 bisan wala pa makasecure sang Environmental Compliance Certificate (ECC) agud may-ara na sang bag-o nga mahabuyan sang basura.
Pasalig sang chairperson sa Committee on Environment and Ecology sa Sangguniang Panlungsod nga willing ang City Government nga magbulig sa pagtransport sang basura gikan sa old dumpsite sa Brgy Mandalagan, Bacolod City.
Sa interview sang Bombo Radyo Bacolod kay Bacolod City Councilor Homer Bais. ang issue ang ginsalo na lamang ni Environmental Management Bureau-Negros Island Region Director Vicente Los Bañes, bangod ang anay nagakapot sini amo ang EMB Region 6.
Ini kasubong man sa ila, bangod ang mga opisyales sa karun sa ciudad ang nagsalo na lamang sa problema sang tinalikdan nga administrasyon.
Suno sa konsehal dapat maplastar ang garbage disposal plan kag indi na masulit ang kaangay sa ginhimo sang tinalikdan nga amat-amat nga gindispose ang mga basura sa tupad sang Sum-ag River, sa reclamation sa Brgy Punta Taytay, kag sa old airport sa Brgy Singcang.
Pahayag sini nga sa conference nga ginpangunahan sang EMB-NIR, igatest kun ano ang mga chemical contents nga yara sa basura antes hakuton.
Apang suno diri ang proponents ukon bag-o nga nagapanag-iya sang duta amo ang dapat maggasto sa pagtransport sang basura sa nagakaigo nga halabuyan.
Ginkadtuan man mismo ni Bacolod City Mayor Greg Gasataya ang site, kag nagpasalig nga ang ciudad ang willing nga magbulig.
Ginklaro naman sa ila sang EMB-NIR nga normal lamang nga ginarepurpose ang mga old dumpsite, apang luyag lamang nila nga maseguro nga indi mabasulan ang ciudad sa ulihi.
Paathag ni Bais nga wala gid nagapamatok ang ciudad sa development, apang indi dapat mabutang sa alang-alang ang ikaayong lawas sang mga pumuluyo.
