Tanan nga estudyante sa Negros Occidental High School na ang malakip sa tuigan nga hatagan sang libre nga school supplies sang Bacolod City Government.
Sa interview sang Bombo Radyo Bacolod kay Bacolod City Mayor Greg Gasataya, nakapreparar na ang mga ipanagtag nga school supplies kag sila ang nagakoordinar na lamang sa NOHS para sa distribusyon sa masunod nga semana.
Ang mga estudyante ang magabatun sang sling bag kag school supplies.
Paathag sang alkalde nga nagdesisyon sila nga hatagan na lamang ang tanan bangod mayorya man sang mga estudyante sa NOHS ang Bacolodnon.
Madumduman nga una na nga nahatagan ang mga elementary students sa idalom sang Department of Education division of Bacolod City sang school bag kag school supplies, samtang PE uniform kag school supplies naman sa high school.
Wala nadala ang NOHS sa una kag sadto nga mga distribusyon bangod ini ang yara sa idalom sang DepEd Negros Occidental kag indi sa Bacolod.
Apang bangod mayorya sa mga estudyante sa buluthuan ang Bacolodnon, ginpakamaayo sang alkalde nga sila ang mahatagan sang bulig sa pag-eskwela.
Pahayag ni Mayor Greg nga ginlakip na lamang ang NOHS sa yearly budget bangod ini ang masarangan man sang ciuadad.
