Nagapasalamat ang presidente sang Bacolod Alliance of Commuters, Operators, and Drivers (BACOD)-Manibela sa national government sa paghatag sang fuel discount sa mga qualified Public Utility Vehicles (Vehicles) paagi sa mga gasolinahan.
Sa interview sang Bombo Radyo Bacolod kay Rudy Catedral, Presidente sang Bacolod Alliance of Commuters, Operators, and Drivers (BACOD)-Manibela, ang Land Transportation Franchising and Regulatory Board (LTFRB) ang naghatag sang listahan sa mga accredited fuel stations kag sa tion nga magpatughong ang mga PUV drivers ginalantaw nila sa listahan ang plaka kag pangalan sa rehistro kag kun qualified ginahatagan nila sang discount.
Suno kay Catedral, 20 liters per day nga pagtughong ang ginahatagan sang discount.
Suno diri, ang makinot sa isa ka adlaw bangud sa fuel discount ang dako na nga dugang sa income sang mga drivers nga mapauli sa ila nga pamilya.
Samtang, ginpahayag man ni Catedral nga sang nagbisita si LTFRB Chairman Vigor Mendoza II sa Bacolod City iya man ginpangayo nga mahatagan man sang discount ang mga on process pa ang mga dokyumento para sa provisional authority.
Dako ang pasalamat sini sa discount nga ginpaagi sa fuel stations nga mas epektibo sangsa ihatag nga financial assistance nga indi man tanan ang makabaton.
