Ginserbihan sang National Bureau of Investigation (NBI) – Bacolod sang Search Warrant ang isa ka pasilidad sa Prk Pedring, Brgy Estefania, Bacolod City bangod sa illegal refiling sang single use butane canister, kaina sang aga.
Sa interview sang Bombo Radyo Bacolod kay NBI-Bacolod Executive Officer William de Arca, sila ang nakabatun sang report tuhoy sa illegal nga aktibidad kag ini ang ila man nga ginsurveillance antes ginserbe ang search warrant.
Sa pagdeliver sang mga narefill nga butane cannister sang tag-iya, nagpatawag na ang mga NBI operatives sang mga opisyales sang Barangay agud makawitness sa operasyon, kag ila na lamang ginhulat nga makaabot ang tag-iya.
Nakita man sa pag-abot sang salakyan nga ini ang puno man sang mga may unod kag blangko nga butane cannisters.
Sa pagsulod pa lamang, nagsugata na sa ila ang masobra 30 ka crates ukon kahon nga naga-unod sang butane canisters, samtang ma-ara naman ini sang separado nga kwarto kun sa diin mismo ginapatigayon mismo ang refilling.
Suno kay De Arca, delikado ang nasambit nga aktibidad ilabi na ang kwarto ang wala gid sang opening.
Dugang pa sini nga wala ginapahanugutan ang pagrefill gamit ang LPG tank, kag may-ara gid sang mga authorized refiller.
Ang NBI-Bacolod ang magafile sang kaso sa paglapas sa Republic Act 11592 ukon LPG Industry Regulation Act.
Nakadepende naman sa mga kompanya nga ginagamit ang ila pangalan sa illegal refilling business kun sila ang magapasaka sang civil case.
