Nagpaandam ang Department of the Interior and Local Government-Negros Island Region (DILG-NIR) sa mga barangay officials nga indi dapat paggamiton ang programa nga Bawat Barangay Makikinabang (BBM) Scholarship para sa pagpabor sa mga himata ukon malapit sa mga opisyales sang barangay.
Suno kay DILG-NIR Assistant Regional Director Teodora Sumagaysay, ginapatuman sang DILG Memorandum Circular 2026-038 ang maathag nga basehan sa pagpili sang mga benepisyaryo sang programa, kalakip ang qualifications, criteria kag proseso sang selection.
Ginpahayag ni Sumagaysay nga dapat mangin transparent ang pagpili sang barangay scholars kag ini ang pangunahan sang chairman sang Committee on Education sang barangay.
Kinahanglan man nga may dokumentasyon ang evaluation kag selection process agod masiguro nga husto kag patas ang paghatag sang scholarship.
Suno kay Sumagaysay dapat tandaan sang mga Barangay Officials nga sa pagpili sang scholarship beneficiaries ang wala sang conflict of interest, nepotism kag favoritism.
Suno sa DILG-NIR Assistant Regional Director, ginadumilian ang nepotism ukon ang pagpili sang mga himata sang barangay officials tubtob sa third degree of consanguinity.
Ginpahayag man sini nga kinahanglan unahon sang mga opisyales ang interes sang publiko kag indi ang personal ukon interes sang ila pamilya.
Samtang, ginpahayag ni Sumagaysay nga nakabaton na ang iya talatapan sang mga reklamo may kaangtanan sa pagpili sang BBM scholars halin sa Bago City, Cauayan kag Moises Padilla.
Ginapanawagan sang DILG-NIR ang mga barangay officials nga sundon ang ginpatuman nga guidelines kag siguruhon nga ang proseso sang pagpili sang scholars mangin patas, transparent kag wala sang ginpasulabi.
