Ginaimbestigaran na sa karon sang mga otoridad ang gaming kag messaging history sang menor de edad nga responsable sa pagpangluthang sa Ateneo De Zamboanga University kahapon sang aga, Agosto 18, agud matumod ang ugat sang insidente, suno kay DILG Secretary Jonvic Remulla.
Sa naglapta nga footage sang aktwal nga pagpangluthang, makita nga naga-panic kag nagapanago ang mga estudyante sa sulod sang mga classrooms samtang mabatian ang asod-asod nga paglupok sang armas-luthang sa background.
Gin-livestream naman sang estudyante nga shooter ang insidente nga daw kaangay sa video games, antes sini gin-utas ang kaugalingon nga kabuhi.
Apat ang kumpirmado nga napatay, lakip ang isa ka Grade 10 student kag ang menor de edad nga suspek.
Padayon pa ang pag-imbestigar kun paano napasulod sang Grade 9 nga shooter ang mga armas-luthang sa sulod sang buluthuan.
Duha ka armas-luthang ang nadiskubrehan sang mga kapulisan, isa ka Glock 9mm handgun kag isa ka custom built M16 rifle.
Nakit-an man sang mga kapulisan ang bag sang estudyante nga may unod nga ammunition magazine.
Gin-relieve naman ang Customs police chief sang Bureau of Customs sa nasambit nga probinsya bangud sa iya nakarehistro ang armas-luthang, nga amo man ang amay sang suspek.
Ginpahanugyan ni Remulla ang publiko nga indi anay mag-focus sa politika sa baylo seguruhon gid ang seguridad sang mga kabataan.
Nagpahanumdom man ini sa mga gun owners nga mas mangin responsable sa paghupot sang armas.
