Nagapati si former COMELEC Comissioner Atty Rowena Guanzon nga ang iya mortal enemy nga si former House Speaker Martin Romualdez ang sa likod sang recantation ni retired Marine Technical Sergeant Orly Guteza, kag sa pag-ulamid sini sa iya pangalan.
Sa interview sang Bombo Radyo Bacolod kay Guanzon, gintawag sini nga ‘butigon’ si Guteza sang magpahayag nga ginhatagan siya ni Senator Rodante Marcoleta sang numero ni Guanzon agud magserbe sini nga abogado.
Panindugan ni Guanzon nga wala man sang may nagcontact sa iya, kag wala rasun nga siya ang mangin abogado ni Guteza bangod indi niya man ini kilala.
Nagapati ini nga siya ang gin-ulamid na lamang bangod siya ang nagasuporta kay Marcoleta, kag madugay naman sila nga nagabunggu-anay ni Romualdez.
Apang paandam sini kay Guteza nga siya ang mangatubang sa Ombudsman bangod sa recantation ilabi na nga ang nauna sini nga affidavit ang gingamit sa pagfile sang plunder case.
Dugang pa suno diri nga ginpahayag man ni Ombudsman Remulla nga sarang man nga malakip si Guteza sa kaso bilang conspirator.
Pahayag ni Guanzon nga siya ang magapa-fiesta bangod malapit nalang mapriso si Romualdez.
Panawagan sini kanday Ombudsman Jesus Crispin Remulla kag President Ferdinand Marcos Jr. nga tuod-tuoron ang nauna na nga pasalig nga sila ang wala sang pinilian bisan abyan pa ukon pamilya ang makasuhan, sila ang indi magpamalabag.
Apang kaangay suno diri nga nahadlok si Marcos kay Romualdez.
Ginalantaw sini nga yara ang kahangawa nga itudlo ni Romualdez nga si Marcos ang sa likod sang mga kurapsyon.
Ang dapat ipamangkot suno diri kay Guteza, kun ano ka bug-at ang maleta, kabaylo sang konsensya.
Pahanumdom ni Guanzon nga sang siya ang nagdaog sadto bilang P3PWD Represetative, siya ang wala ginpapungko ni Romualdez gani sila ang napilitan nga magpili sang magabulos.
Apang si Maria Camille Ilagan nga ila napilian, ang wala man gintawag ni Romualdez apisar nga sila ang atubangay lamang sang pulungkuan.
Para kay Guanzon, ini ang nagapakita lamang nga may kaugot gid sa iya si Romualdez.
Kampante naman si Guanzon nga apisar sa recantation ni Guteza kag 4 ka iban pa nga ex-body guards, madamo gihapon sang iban pa nga witness kag nagapati ini nga madugangan pa ang mga testigo.
