May yara sang kabug-usan nga 2,279 pieces of evidence nga gin-classify bilang “incriminating” sa kaso batok kay former President Rodrigo Duterte, santo sa International Criminal Court (ICC).
Ang mga ini ang kabahin sang 6,909 pieces of evidence nga ginturn-over sang prosekusyon antes ang trial ni Duterte nga natalana sa Nobyembre 2026.
Humalin pa sang Enero 7 tubtob Hulyo 30, gin-disclose sang prosecution team sa kampo sang depensa ang kabug-usan nga 6,909 ka mga ebidensya nga pagagamiton sa kaso bilang kabahin sang proseso kag base sa pagsulondan sang ICC.
Samtang, 4,573 naman ka mga ebidensya ang classified sa idalom sang Rule 77 kalakip diri ang mga tangible evidence ukon pisikal nga mga materyales nga dapat mahatagan sang tion ang defense team nga usisaon ini para sa paghanda sang ila depensa.
Nagsumiter man ang prosekusyon sang 57 ka mga ebidensya nga “potentially exonerating” nga mahimo makabulig ukon mangin pabor sa bahin sang depensa.
Nakalista man sa mga ebidensya ang impormasyon tuhoy sa barangay clearance operations sadtong drug war kag sa Davao Death Squad.
Kalabanan naman sa mga ebidensya nga yara sa idalom sang Rule 77 ang may kaangtanan sa contextual elements nga nagaserbe bilang background information sa kaso.
Sa karon wala pa sang pahayag ang kampo ni Duterte.
Nagapabilin nga nakapriso subong ang anay presidente sa ICC bangud sa ginapangatubang nga mga kaso may kaangtanan sa crimes against humanity angot sa war on drugs.
