Kapin 80 tubtob 100 ang nagtipon sa monumento ni late Senator Benigno “Ninoy” Aquino Jr. sa dalan Araneta, Bacolod City para sa pagdumdom sa ika-43 nga anibersaryo sang kamatayon sini subong nga adlaw, Agusto 21, Ninoy Aquino Day.
Ang pagtilipon ang ginpangunahan sang Federation of Urban Poor (FED-UP) Negros Occidental chapter, kun sa diin sila ang naghalad sang bulak kag pangamuyo.
Indi kaangay sa nakaandan nga nakasuksok sang yellow nga panapton, ang mga nagtambong ang nagsuksok sang puti.
Sa interview sang Bombo Radyo Bacolod kay Joy Jarabelo, Provincial Coordinar sang FED-UP Negros, ginpanindugan sini nga sila ang nagsuksok sang puti bangod ang pagdumdom kag pagkilala sa hinimuan kag sakripisyo ni Ninoy ang wala sang political color.
Naghatag man sang mensahe ang pila ka sektor, kalakip ang pahanumdom nga indi kalimtan ang ginbilin nga halimbawa ni Ninoy sa pagtindog para sa matarong.
Kasubong man ang panawagan sa pagtindog sa kinamatarong sang Pilipinas sa West Philippine Sea, kag ang “isa lang” sa kada pamilya sa politika ukon ang pagduso nga mapasar ang Anti-Political Dynasty Bill.
