Gin-akusaran ni anay House Speaker Martin Romualdez si Atty. Levito Baligod nga gin-alegar ginganyat ang 25 ka anay security aides ni former Ako Bicol Party-list Representative Elizaldy Co nga mag-upod sa 18 ka mga bodyguards ukon ang ginatawag nga “maleta boys”.
Ginlakip niya ini sa iya nga supplemental counter affidavit.
Ini ang base sa affidavits of denial kag non-participation nga gin-file sang 25 ka mga security aides, sa diin ginsiling nila nga ginganyat sila ni Baligod nga mag-upod sa ila kampo kabaylo sang kwarta.
Si Baligod ang naga-serbe nga abogado sang 18 ka “maleta boys” nga nangin 14 na lamang matapos mag-recant ang apat.
Nakapahayag man sa mga affidavit nga wala sang may ginpatigayon nga deliveries ang tanan nga 25 ka security aides sa kabug-usan sang ila nga employment humalin 2025 tubtob 2026.
Ginbuyagyag naman ni Romualdez nga isa sa mga security aide nga ginkilala nga si Arnilo Ramirez ang nagpahayag nga gin-alegar nagaplano si Baligod nga magtukod sang ikaduha nga batch sang mga testigo kasunod sang 18 ka bodyguards, sa diin gindala si Ramirez kaupod ang iban pa sa isa ka hotel sa tunga-tunga sang Marso kag Abril 2026 agud magpirma sa nakahanda na nga affidavit.
