Nagsaka na sa masobra 2,500 ka indibidwal ang napatay sa Ebola outbreak sa Democratic Republic of Congo (DRC), samtang madasig nga nagalapta ang virus sa isa ka lugar nga mas malapad pa sangsa France, santo kay United Nations Ebola coordinator Julien Harneis.
Nagpanawagan si Harneis sang bulig pinansyal bangud ang pondo ang lapit na lang maubos sa sulod sang pila ka semana.
Ang ika-17 nga epidemya sang Ebola sa Congo ang nangin pinakalapnagon sa maragtas sang pungsod base sa numero sang kaso humalin pa sang Hulyo.
Ang nasambit nga outbreak ang tuga sang Bundibugyo species sang Ebola, nga wala pa gihapon sang aprubado nga bakuna ukon partikular nga bulong.
Magluwas sa madasig ini maglapta, nagapangatubang man sang risgo ang mga health worker.
Suno kay Harneis, kapin sa 160 health workers ang nalatnan sang Ebola kag 43 diri ang ginbawian sang kabuhi.
Nakaeksperyensya man sang pagpang-atake ang mga health workers sa diin indi magnubo sa 260 ka mga pag-atake kalakip ang pagsunog ukon pagpanghaboy sang bato sa mga ambulansya kag sa mga health facility.
Santo sa mga humanitarian worker, ginapalala sang kahadlok kag sala nga impormasyon ang tensyon sa mga komunidad.
Nahibaluan nga nagapati ang iban nga himo-himo lamang ang outbreak samtang nagapangakig naman ang mga pamilya nga ginadumilihan ang personal nga paglubong sa mga naigo sang virus.
