Nagdangat sa 6.5 million ka Pilipino ang nakahalin sa kahimtangan sang kapigaduhon matapos nga nagdul-ong sa rekord nga 9.7 percent ang level sang kapigaduhon sa pungsod sang 2025, suno sa Philippine Statistics Authority (PSA).
Amo ini ang una nga tion nga nagpanubo sa single digit ang level sang kapigaduhon.
Ginakabig ini nga isa ka dako nga milestone bangod natuman ini sang mas temprano ukon tatlo ka tuig antes sang target nga 2028, suno sa Philippine Development Plan (PDP) sang gobyerno.
Santo sa datos sang PSA, yara sa 11 millon ka Pilipino ang nagakabuhi nga yara sa idalom sang poverty threshold sang nagligad nga tuig, mas manubo kumpara sa 17.5 million sang 2023.
Ang pagpanubo sang level sang kapigaduhon ang ginalakipan sang 22 percent nga pagtaas sang nominal nga kita sa tunga-tunga sang 2023 kag 2025, nga mas mataas kun ipaanggid sa 5 percent nga inflation rate sa amo man nga panahon.
Sa isa ka statement, ginpahayag ni Economic Planning Secretary Arsenio Balisacan nga sa una nga tion, mas manubo na sa isa sa kada napulo ka Pilipino ang nagakabuhi sa idalom sang poverty line.
Suno sa iya, ang paglab-ot sang mas manubo nga level sang kapigaduhon antes pa sang target nagapakita sang pagpalapad sang economic opportunities, upod ang epektibo nga social protection, nga makahatag sang makahulugan nga pagbag-o sa kabuhi sang mga Pilipino.
