Nagapati ang political analyst nga kwarta ang nagahulag sa likod sang mga recantation sang mga testigo sa ginpasaka nga plunder case kay former House Speaker Martin Romualdez.
Sa interview sang Bombo Radyo Bacolod kay Atty Jomax Ortiz, wala ini nagapati nga mahimo ni President Ferdinand “Bongbong” Marcos Jr nga ipapriso ang iya pakaisa nga si Romualdez.
Ini bangod sa kahangawa nga ini ang mag-ibwal kaangay sang pag-ibwal ni former Ako Bicol Partylist Representative Zaldy Co.
Nagapati si Ortiz nga ang nagakatabo ang political manuevre ukon damage control, bangod hinali nga maglain ang buot ni Romualdez mahimo man sini butungon si Marcos sa isyu sang flood control corruption.
Samtang nagapati man ini nga kwarta ang sa likod sang mga ex-bodyguards ukon bagmen ni Zaldy Co, kun sa diin apat na ang nagrecant sa alegasyon nga nagdul-ong sang male-maleta nga kwarta sa balay ni Romualdez
Ginalantaw ni Ortiz nga gintanyagan sang kwarta ang mga ex-bodyguards nga ginakilala man nga maleta boys, apang bangod napriso sanday former Congressman Mike Defensor kag Senator Rodante Marcoleta, mahimo nga wala na sang makabayad sa ila.
Gani ginalantaw sini nga nag-offer sang mas dako nga balor ang kampo ni Romualdez nga rasun sa pagrecant sang apat, kasubong man si ex-Marine Orly Guteza.
Nagapati si Ortiz nga may dugang pa nga magarecant.
Dugang pa ni Ortiz nga joint affidavit ang ginpirmahan sang 18 ka maleta boys kag indi individual affidavits, gani sa pagrecant sang apat, makwestyon naman ang kredibilidad sang affidavit nga ginkasugtan nila tanan.
