Pila ka mga persona ang nadakpan sang mga police stations sa Bacolod kadungan sang expanded Oplan Bulabog nga ginpatigayon sang Hwebes sang gab-i, Agusto 20.
Sa interview sang Bombo Radyo kay Police Lt. Col. Albart Tare, deputy city director for operations sang Bacolod City Police Office, ang Bacolod City Police Station 8 ang host station kag sa Barangay Singcang Airport ginpatigayon ang operasyon kun sa diin ila nga ginsulod ang Purok 3, 4, 5, kag 6 sa Magsungay.
Naserbe ang warrant of arrest kay Fritz de Mesa bangud sa violation sang Section 2 sang Presidential Decree 1619.
Magluwas sa iya, nadakpan man ang duha ka mga indibidwal nga nagasugal kag sila ang may kaso nga paglapas sa Presidential Decree 1602.
Suno kay Tare, indi lamang ang Station 8 ang nagpatigayon sang operasyon kundi nagdungan man ang iban nga police stations sa ciudad nga nagresulta sa pagkaaresto sang nagaduso sang illegal substance, loose firearms kag mga wanted persons.
Sa tion sang operasyon, nag-upod man ang mga force multipliers sa mga pulis.
Ang expanded Oplan Bulabog ang anti-criminality and law enforcement initiative kag kabahin sang SAFE NIR DIAL 911 PROGRAM.
