Temporaryo nga ginlimitahan sang National Kidney and Transplant Institute (NKTI) ang admission sang walk-in patients matapos mapuno ang bed capacity sang ospital sa Quezon City tuga sang nagasaka nga kaso sang leptospirosis.
Dugang pa ang nagadamo nga numero sang pasyente sa emergency room, santo sa advisory nga ginpagwa kahapon, Agosto 23.
Gin-abisohan ang mga pasyente nga nagakinahanglan sang non-emergency admission nga makig-koordinar anay sa ila attending physicians kasubong man sa pagkonsidera sa iban nga healthcare facilities nga may available pa nga kwarto agud malikawan ang paghulat sang malawig.
Ang leptospirosis ang isa ka bacterial infection nga gakalaton paagi sa ihi ukon higko sang mga infected nga sapat, partikular na sang mga ilaga.
Mahimo ini makaapekto sa tawo kag sa sapat.
Suno sa Department of Health, nagdangat na sa 220 ka leptospirosis patients ang ginbawian sang kabuhi sini nga tuig, samtang, 3,440 ang narekord nga kaso sang nasambit nga sakit halin Enero tubtob Agosto 8.
Nagpahanumdom naman ang DOH sa publiko nga maglikaw gid sa tubig-baha ilabi na kun may yara sang pilas sa lawas.
