Magasugod na sa sini nga semana ang amat-amat nga pag-ilis sang ciudad sang Bacolod sang mga solar street lights sa bahin BS Aquino Drive.
Suno kay Bacolod City Mayor Greg Gasataya, islan ang mga existing street lights sang solar streetlights sa bahin sang BS Aquino Drive halin sa Ramos padulong sa Shopping.
Kasunod ang Lopez Jaena Street padulong bangga patyo lakip na ang bahin sang 6th street.
Dugang pa sini, pagakay-uhon man ang center island kag mga sidewalks.
Suno sa Alkalde, solar powered lights ang iga-install agud mas masanag kag uniform.
Ginhambalan man ni Mayor Gasataya ang City Engineers Office nga isaylo sa mga interior areas ang iban nga nagagana pa nga streetlights agud magamit pa.
Paathag sini nga gina-una anay ang pagkay-o kag pag-improve sa mga major roads kag kun matapos na, isunod naman ang iban nga mga area.
Madumduman nga ang amo nga proyekto ang kabahin sa ginmensyonar ni Mayor Gasataya sa iya nga State of the City Address (SOCA) kun sa diin masobra 200 ka mga solar streetlights ang iga-install sa ciudad sa bahin sang BS Aquino Drive.
