Indi manaug sa 47 ka indibidwal ang ginbawian sang kabuhi kag masobra 50 naman ang gin-kidnap matapos ginsalakay sang mga armado nga grupo ang isa ka anay malinong nga komunidad malapit sa capital sang Haiti santo sa United Nations kahapon.
Ginapatihan isa ini sa pinakadako nga mass kidnapping sa Haiti.
Sa isa ka video nga gin-post sa social media, ginpahog sang gang leader si Vladimir Paraison, Director sang National Police sa Haiti nga patyon sini ang mga bihag kun may mapatay nga katapo sang ila grupo samtang ginatinguhaan man nila nga makuha ang kontrol sa komunidad sa ibabaw sang Port-au-Prince.
Ang insidente ang isa ka dako nga pagtilaw sa politika kag seguridad sang pungsod, kasubong man sa gobyerno, sa mga otoridad, kag sa mga international mission, suno kay Romain Le Cour, head sang Haiti Observatory sa Global Initiative Against Transnational Organized Crime.
Suno sa iya, isa ka trap ang pagpamahog nga patyon ang mga bihag.
Kun ang mga otoridad indi maghulag, mapaslawan sila sa pag-amlig sa mga bihag, kun maghulag sila kag mapatay ang isa ka hostage, basulon sang mga gang ang estado.
Ginpakilala sang lider ang kaugalingon bilang si Izo 2, nga kilala man bilang Izo ukon Johnson Andre, isa sa pinakagamhanan nga gang leader sa Haiti.
