Aminado ang Filipino missionary sa Nepal nga mabudlay ang pagpatigayon sang rescue operations sa mga lugar nga apektado sang malala nga flash floods bangod sa mga road obstructions kag pagkadula sang power supply.
Sa interview sang Bombo Radyo Bacolod kay Dr. Hector Gayares, lima ka tuig na nga missionary sa Nepal, natunga sa tatlo ka sahi ang kadutaan sa pungsod.
Ini ang ginalakipan sang patag, hilly area nga katumbaas na bisan sang pinakamataas nga bukid sa Pilipinas, kag ang Himalayan Mountain Range.
Ang hilly region ang yara sa kapin 3,000 meters above sea level kaangay sa iya gina-istaran nga mapaanggid sini sa Baguio.
Samtang ang mountain range ang nagataas naman sang 4,000 tubtob 8,000 meters above sea level, kun sa diin ang ibabaw ang makita nga napuno na sang snow kaangay sang Mount Everest.
Nahibaluan nga ang malala nga flashfloods ang epekto sang nagcollapse nga glacier wall sa Northern Nepal malapit sa border sang Tibet, China.
Paathag ni Gayares nga bangod sa mabugnaw nga temperatura, sa masami naga-ice ang outer part sang mga suba sa ibabaw sang bukid, apang bangod mabug-at na ang tubig sa ibabaw, mahimo nga nagcollapse ang ice wall.
Indi kaangay sa baha nga tuga sang pag-ulan nga amat-amat ang pagsaka, ini ang mapaanggid ni Gayares sa dam nga narumpag ang pader.
Bangod ini ang yara sa ibabaw, apektado sang bulyada sang tubig ang mga komunidad sa idalom.
Suno kay Gayares, ang mga pumuluyo sa Nepal ang masami nagapuyo malapit sa mga suba, para sa mas mahapos nga source sang tubig.
Tuman naman ka baskog ang flash floods nga naglab-ot pa malapit sa Indian border sa Southern Nepal.
Ginalantaw ni Gayares nga magasaka pa ang reported deaths bangod madamo pa sang nagapabilin nga missing.
Suno diri,apisar nga maayo ang disaster preparedness sa Nepal, wala gid ginalauman ang kaangay nga trahedya.
Nagdeploy naman sang government kag private helicopters para sa rescue operations, apang aminado si Gayares nga mabudlay ang pagrescue by land bangod kadungan sang flash floods, may mga nagluntad man nga landslide kag iban pa nga road obstructions.
Dugang pa nga nadulaan sang kuryente ang mga lugar nga malala nga nahalitan.
