Pabor ang Secretary-General sang Alliance of Concerned Teachers – Negros Island Region Union sa pag-ban sang facebook sa Pilipinas, apang dapat maseguro sang gobyerno nga may-ara sang safeguards para sa henerasyon nga natawo na nga may facebook.
Sa interview sang Bombo Radyo Bacolod kay Grace Abellar, bangod na-eksperyensyahan na sini ang panahon nga wala pa sang facebook, siya ang pabor nga madula ang ang online site bangod para sa iya mas malinong ang pangabuhi sadto.
Apang ginakonsiderar man sini ang mga ulihi nga henerasyon nga natawo nga yara na ngadaan ang facebook.
Aminado ini nga bigger majority sang populasyon sa Pilipinas ang nagagamit na sang facebook, kag para sa iban ini ang kabahin na sang ila pang-adlaw adlaw nga kabuhi.
Ini ang nagaserbe man nga outlet sang iban para makapa-utwas, gani ang hinali nga pag-ban diri ang mahimo makatuga sang dako nga pagbag-o sa ila kabuhi.
Ginakahangawa ni Abellar nga kun wala sang alternatibo nga tikang ang gobyerno kag hinali nalang dulaon ang facebook, may ara sang maglain ang pinsar, dugang pa nga ini ang nagaserbe naman nga source of income sang pila ka pumuluyo.
Suno diri, ang hinali nga pag-shift ang mahimo makaapekto sa mental kag psychological nga aspeto partikular na sang mga kabataan.
Nakita man sini nga apisar madamo sang benepisyo ang facebook partikular na sa information dissemination, madamo man sang masagap diri nga indi maayo ilabi na para sa mga kabataan.
Ginarekomendar man sini ang mahimo paghatag na lamang sang mas hugot nga security measures antes maka-access sa facebook.
Suno kay Abellar, bisan may settings sa facebook nga nagadumili sa pagregister sang mga minors, kun kis-a ang ginikanan pa ang nagahimo sang facebook account para sa ila kabataan, kag ginapeke lamang ang edad.
