Inugbakal kuntani sang bugas ang gintaban nga baligya sang menor de edad nga hilaw nga mais sang isa ka LGBTQ member sa circumferential road sa bahin sang Bangga Sagrado, Brgy. Guihalaran, Talisay City.
Ang biktima ang isa ka 13-anyos nga lalaki nga ginkilala nga si Navarro Illuminado III.
Siya ang nag-untat na sa pag-eskwela bangud sa kapigaduhon kag nagabulig sa iya amay sa pagbaligya sang mga mais.
Sa interview sang Bombo Radyo sa biktima nga si lluminado III, ginpahayag sini nga natrauma siya sa natabo
Suno diri nga naghambal nalang kuntani ang suspect nga mangayo siya sang mais kag ini ang iya hatagan sa baylo nga manginto.
Ginsaysay sini ang natabo kun sa diin suno diri, nagpondo ang suspect sakay sa iya tricycle sa ila tindahan kag naghambal nga mabakal siya sang mais.
Timing man nga nagpangahoy ang iya amay gani wala siya sang upod.
Ginkarga sang suspect ang isa ka sako nga mais sa tricycle.
Nagpasalig ini nga magbayad didto sa iya pwesto sa Busay, Talisay City gani nag-upod siya sakay sa tricycle.
Sang nag-abot na sa economic highway padulong sa Brgy. Granada, ginsugo sang siya sang susepct nga kuhaon ang parilyahan sa isa ka babayi apang pagbalik sini nakita niya nga nag-andar na ang tricycle kag nagpalagyo na ang suspect dala ang isa ka sako nga mais.
Suno sa menor de edad, ang suspect ang pution kag ginabanta yara sa 5’6 ang kataason, may tattoo sa kamot, kag may aritos.
Ini ang nagamaneho sang top down tricyle nga suno sa biktima, wala sang plaka kag medyo madaan kag gubaon na.
Samtang, ginpahayag naman sang amay sang biktima nga tuman ang paghilibion sang iya bata kag natrauma na sa natabo.
Sa interview sang Bombo Radyo kay Iluminado Navarro Jr., amay sang biktima, ginpahayag sini nga sa duha ka tuig nila nga pagbaligya sang mais, ini ang una nga kahigayunan nga sila ang ginkawatan.
Tuman ang iya kakulba bangud luwas sa gintaban ang ila baligya, gindala pa sang suspect ang iya bata.
Suno diri, natingala na lamang siya sang pagbalik niya sa ila tindahan halin sa pagpangahoy, wala na ang iya bata kag ang baligya nga mais.
Namangkot siya sa mga katupad kag ginhambalan nga ang iya bata ang nag-upod sakay sa tricyle sang suspect.
Nagsulod na dayun sa iya paminsaron nga modus gani gintinguhaon sini nga malaot ang suspect apang nagbalik siya bangud naubusan siya sang gasolina.
Wala man siya sang kwarta nga ipatughong.
Ginapakamaayu na lamang sini nga luwas nga nakapauli ang iya nga bata.
Mensahe sini sa suspect nga mangabuhi sang patas bangud sila ang nagtinguha kag nagabulad sa init agud makakaon sang insakto bangud sa kapigaduhon.
