Nangin madinalag-on ang ginpatigayon nga labing una nga pasundayag sang kapulisan sang Bacolod City Police Office sa tanan nga mga uniporme nga ila ginasuksok.
Sang Biyernes, ginshowcase sang mga kapulisan ang ila tagsa ka uniporme kag ginhambal kun ano ang papel sini sa ila hanay.
Sa interview sang Bombo Radyo kay Bacolod City Police Office Director PCol. Eugene Rebadomia, importante ang nasambit nga aktibidad bangud ini ang una nga kahigayunan nga mapakita sang mga kapulisan ang tanan nila nga uniporme lakip na ang wala pa nakit-an sang publiko.
Suno diri, paagi man sini mapataas ang moral sang mga kapulisan nga makita sang ila pamilya nga nagasuksok sa amo nga uniporme.
Nagpasalamat si Rebadomia kay Bacolod City Mayor Greg Gasataya, Lone District Representative Albee Benitez, mga stakeholders kasubong man kay PRO NIR Regional Director Police Brigadier General Rudecindo Reales sa pagpahanugot sa ila nga magpatigayon sang “Pasundayag ng Kapulisan.”
