Ginkumpimar ni Department of the Interior and Local Government (DILG) Secretary Jonvic Remulla nga exposed sa ‘dark web’ kag may depression ang menor de edad nga suspect sa pagpangluthang sa Banga National High School sa South Cotabato.
Ini ang ginakabig nga nagapanguna nga rason sa pagpangluthang sang estudyante, nga nagresulta sa pagkamatay sang duha man ka estudyante kag pagkasamad sang walo ka iban pa.
Suno kay Remulla, may mga “dark web” website nga nakatago sa sulod sang pila ka mobile app nga ginagamit sa pag-impluwensya sa mga kabataan nga maghimo sang krimen.
Isa man sa nakita niya nga dako nga problema amo ang mas mahapos nga pag-access sang mga kabataan sa social media subong.
Bangud sini, nakigkoordinar na ang ahensya sa Department of Information and Communications Technology (DICT) agud ma-limitahan ang access sang mga menor de edad sa social media kag mapalayo sila sa mga tawo nga may malain nga tuyo.
Ginahingyo man ni Remulla ang mga ginikanan nga bantayan ang ila mga kabataan kag i-monitor ang ila mga ginahimo sa internet kasubong man ang mga tawo nga ila ginaistorya online.
Samtang, ginpahayag sini nga wala sang kakulangan ang mga otoridad sa seguridad sang eskwelahan.
Bangud suno sa iya, natsekyar man ang bag sang bata, apang nahibaluan nga gintago sini ang armas sa iya nga likod.
Ginklaro man ni Remulla nga wala sila sang plano nga limitahan ang media sa pagpaambit sang impormasyon, partikular na sa kaangay nga insidente.
Suno sa iya, importante nga mahibaluan sang publiko ang matuod nga mga nagakatabo kag ang mga butang nga indi dapat himuon.
