Pila ka mga grupo ang nagtipon sa EDSA Shrine kahapon, Setyembre 20, bilang kabahin sang ila pagpanawagan sang accoutability sa mga involved sa korapsyon, isa ka adlaw antes ang 54th commemoration sang Martial Law declaration.
Kalakip sa mga nag-intra sa protesta amo ang mga estudyante, mga manunudlo, lagor groups, kasubong man ang religious sector.
Apisar sa magkatuhay nga mga ginapanawagan, ang mga raliyista sa EDSA ang naga-isa sa pagsinggit sang “Never Again. Never Forget Martial Law.”
Antes magpadulong sa EDSA Shrine, nagpatigayon sang motorcade ang civil society group nga August Twenty One Movement, pakadto sa Supreme Court (SC) sa Manila agud ipabati ang ila petisyon batok sa acquittal kay anay First Lady Imelda Romualdez Marcos sa iya nga graft charges.
Madumduman nga gin-overturn sang Korte Suprema ang graft conviction ni Imelda sa gina-alegar financial interests sini sa pito ka Swiss foundations.
Sa pihak nga bahin, may mga grupo man nga nagmartsa naggikan sa House of Representatives sa Quezon City padulong sa EDSA Shrine.
Sila naman ang nag-protesta batok sa anomalous flood control projects sa pungsod.
Hugot man nga ginpanawagan sang grupo ang pagkakas na sang job contractualization kag political dynasty.
Masobra 15,000 ka mga police personnel sang National Capital Region Police Office kag kalapit nga rehiyon, ang gin-deploy humalin pa sang Sabado.
