Ginpasalamatan ni Department of Health Undersecretary Mary Ann Maestral ang pagdonar sang pamilya Montilla sang tatlo ka ektarya nga duta sa Barangay Canturay, Sipalay City agud nga mapatindugan sang mental hospital kag drug rehabilitation facility.
Sa interview sang Bombo Radyo Bacolod kay Maestral, dako ang pagpasalamat sini kay Mrs. Merceditas J. Montilla sa paghatag sang duta para sa plano nga patindugon nga duha ka health facility sa nasambit nga ciudad.
Suno kay Maestral ang duta ang tungaon kag ang katunga patindugan sang drug rehabilitation facility bangud nga isla sang Negros wala sang kaangay nga pasilidad nga ginapanag-iyahan sang Department of Health.
Suno sa DOH Undersecretary nga ang patindugon nga mental health facility ang una man sa bug-os nga Negros Island kag ini ang may katuyuan nga indi na mabudlayan ang mga pumuluyo bangud kun may yara sang pasyente nga nagakinahanglan sang serbisyo sa nasambit nga pasilidad ginatabok pa ang mga ini sa banwa sang Pototan, Iloilo.
Ang building ang ginpodohan kag i-manage sang Department of Health.
Ginpahayag man ni Maestral nga may yara na sang proposal ang DOH para mapanguyuan sang budget ang proyekto.
Sa karun ginapreparar pa ang tanan nga mga kinahanglanon nga papeles para sa pagpatindog sang duha ka health facility.
