Nagpatigayon sang press conference ang Negros Power kahapon agud nga mapaathag sa publiko ang secondary regional price cap nga gipatuman sang Energy Regulation Commission sa Wholesale Electricity Spot Market ukon WESM.
Sa interview kay Engineer Joe-Mel S. Zaporteza ang Vice President kag Chief Operating Officer sang Negros Electric and Power Corporation, ang secondary price cap ang ginpatuman sang ERC sang September 10 kag ini ang maga-reflect sa September billing Month sang mga konsumidor.
Suno kay Zaporteza, ginpatuman sang nasambit nga ahensya ang secondary regional price cap bangud sa kakulangan sa generation power nga nagakadto sa WESM.
Suno pa diri, nakita sang ERC nga mahimo magdangat sa P18.00 per kilowatt hour ang bili sang kuryente sa merkado gani nagpatuman sang regional price cap agud nga indi mapilitan ang electric distributor sa pagbakal sa nasambit nga presyo.
Suno kay Zaporteza, kun sa sulod sang 72 oras nga nagpatuman ang WESM sang presyo sang kuryente nga mas mataas sa P12.40 per kilowatt hour, matrigger ang regional price cap kag ang presyo ang islan sang P7.40 per kilowatt hour.
Samtang, gin-athag sini nga indi refund ang matabo bangud sa mando sang ERC ang ginapa-recompute nga presyo sang WESM amo ang sa August gani mabatyagan ang epekto sini sa September pa nga electric billing.
Suno kay Zaporteza, ang epekto sang recomputation amo ang mas manubo nga rate kag dugang pa sini nga subong nga semana pa lang nag-issue sang bill ang electric distributor bangud sa ginhimo nga recomputation.
Kasunod sang pagpatuman sang secondary regional price cap, mabuhinan sang 30 sentimos per kilowatt hour ang bill sang kuryente.
Bangud sini, na late sang anum ka adlaw ang pag-issue sang electric bill gani hatagan man sang Negros Power sang extension ang mga konsumidor sa pagbayad sang ila nga balayran sa kuryente.
Suno diri, subong nga Setyembre mabatyagan sang mga konsumidor nga may yara sang pagnubo bisan paano sa ila nga mga balayran.
