Ginatumod pa sang Sipalay City Government kun ano nga salakyan ang ginhalinan sang molasses spill sa national highway sa Camp Valdez, Brgy Mambaroto, Sipalay City.
Sa interview sang Bombo Radyo Bacolod kay Dionelo Bogtae, executive assistant for operations sang Sipalay City Government, nabatun nila ang report tuhoy sa naula nga molasses alas-6:30 kaina sang aga.
Indi gid man tuman ka lapad sang area nga apektado apang ini ang naula sa dulhugon kag kurbadahon nga dalan.
Bangod sa madanlog ang dalan, dako ang risgo nga makadanlog ang royda sang mga salakyan, kag maglapaw sa dalan, gani ini ang ginsirado nila sang kapin isa ka oras.
Gilayon sila nga nagkoordinar sa Bureau of Fire Protection para sa flashing, samtang nagpatawag man sang traffic kag disaster personnel para maggiya sa mga motorista.
Matapos sang flashing, gilayon man nga ginbuksan ang dalan.
Suno kay Bogtae, may barge gid man nga naga-loading sang Molasses sa Campomanes Bay, nga gikan sa Sta Catalina, Negros Oriental.
Pahayag sini nga gintawgan man nila kag ginpakadtuan ang Campomanes Bay, kun sa diin ginpahayag sang mga driver sang tanker nga lain ang ila nga routa kag wala sila nagalabay sa Camp Valdez.
Aminado si Bogtae nga mabudlay ang pagtumod kun ano nga salakyan ang naka-ula sang molasses bangod wala sang CCTV sa area, kag wala paman sang nagwa nga mahimo nakakita.
Ginpaandam naman nila sa mga tanker nga nagabyahe sang molasses nga mahimo nga ipauntat anay ang ila operasyon, kun indi pagid matumod kun sin-o ang driver nga mahimo na-out of route kag naglabay sa indi nila routa.
