Nasapwan ang isa ka bangkay sang lalaki sa bahin sang Bago River sa boundary sang Brgy Atipuluan kag Brgy Maao, Bago City kapin alas-9:30 kaina sang aga.
Sa interview sang Bombo Radyo Bacolod kay Barangay Atipuluan Kagawad Kent Daryl “Janjan” Memoria, apat ka lalaki nga magapamunit kuntani sa suba ang nakakita sang bangkay.
Ang apat nga ginalakipan sang isa nga residente sang Brgy Atipuluan kag tatlo nga residente sang Brgy Tabunan ang magapanguna na kuntani sang paon nga lago sang sila ang nakapanimaho sang naga-usbong nga baho.
Sa ila nga pagtamwa, nakita nila ang bangkay sa kilid sang suba nga upod sang mga rurok.
Ang area ang kapin 300 metros pa gikan sa highway, kag yara sa 400 tubtob 500 meters naman gikan sa Quezon Bridge ukon Taytay Laba.
Ang lugar ang sakop na sang Hacienda Emma, Brgy Ma-ao, Bago City.
Yara na sa advance stage of decomposition ang bangkay, kag ini ang ginakaon na sang mga ibid sang maabtan kaina sang aga.
Ginalantaw ni Memoria ang posibilidad nga naanod ang bangkay sa unahan nga bahin sang suba pasaka sa banwa sang Murcia, tubtob nga natrap sa area.
Ini bangod may mga nagpamunit pa kahapon sa area kag wala man sang may nakita ukon napanimahuan.
Indi man mahimo nga ini ang gikan sa taytay bangod ang tubig ang padulong na sa baybay.
Ang bangkay ang nakasuksok sang itom nga jacket, itom kag navy blue nga shorts, kag may moose green nga belt bag.
Suno kay Memoria, ang biktima ang masami niya nga nagakakita sa Bago City Public Market.
Ini ang iya nakilala bangod sa madamo nga tattoo sa nawong tubtob sa butkon.
Ini ang may mabukod nga panglawason, kag yara sa 5-foot-2 ang kataason.
Panawagan sang Barangay Kagawad sa mga mahimo himata sang biktima nga magpadulong lamang sa Bago City Police Station kag kumpirmahon ang identity sa punerarya.
