Nagtingob pwersa ang tatlo ka transport group sa ciudad sang Bacolod sa plano nga pagpatigayon sang tatlo ka adlaw nga rally-protest kag transport strike halin Setyembre 28 tubtob 30, Lunes tubtob Miyerkules.
Ini ang pasakupan sang Bacolod Alliance for Commuters Operators and Drivers Negros Island (BACODNI-MANIBELA), United Drivers and Operators Council (UNDOC-PISTON), kag Kabacod Negros Transport Coalition (KNETCO).
Sa interview sang Bombo Radyo Bacolod kay BACODNI-Manibela President Rudy Catedral, apisar nga indi palarehas ang mga kawsa kag may indi paghangpanay sa mga grupo, nadesisyonan nila nga maghugpong para sa isa lamang ka lihok, bangod palarehas man ang ila nga panawagan batok sa tuman nga pagsaka sang presyo sang produktong petrolyo.
Ang aktibidad ang kabahin man sang ila pag-ugyon sa transport strike sang mga National Transport group nga PISTON nga magapatigayon sa Setyembre 29 tubtob 30; kag MANIBELA, nga magapatigayon naman sa Setyembre 28 tubtob 30.
Suno kay Catedral, luyag nila nga mabatian sang National Government, Land Transportation Franchising and Regulatory Board (LTFRB), kag Depatment of Transportation (DOTr) nga indi lamang sa Manila ang problema kundi subong man sa mga probinsya.
Kalakip sa ila panawagan ang pagkakas sang excise tax kag value added tax sa produktong petrolyo.
Kasubong man ang patas nga paghatag sang ayudad sa nagkalainlain nga public utility drivers.
