Nagpahanumdom ang Land Transportation Franchising and Regulatory Board – Negros Island Region sa mga public utility vehicles nga indi ang mga ini makasukot sang saka sa pletehan tubtob nga wala sang napaskil nga bag-o nga fare matrix sa salakyan.
Sa interview sang Bombo Radyo Bacolod kay LTFRB-NIR Director Atty Gerry Llena, indi nila pag-itolerar kun may driver nga magasukot sang kantidad santo sa napahanugutan sa idalom sang gin-aprubahan nga fare hike, kun wala sang mapakita nga basihan sang taripa sa ila nga mga pasahero.
Suno diri, gintinguhaan gid sang LTFRB Central Office nga matapos ang fare matrix guide, agud mangin available na sa Lunes.
Madumduman nga sa naaprubahan nga fare hike, ini ang epektibo sa Lunes, gani fare matrix na gid lamang ang kinahanglan sang mga drivers.
Sini nga hapon, nagpagwa man sang advisory ang LTFRB Central Office nga sarang na nga madownload ang updated fare guide ukon matrix sa ila nga website nga ltfrb.gov.ph. agud makapatuman na sang pasaka sa plete sa Lunes.
Samtang nagpasalig man si Llena nga may mga ayuda pa sa masunod para sa mga transport sector.
Nagahingyo naman ini sang paghangop bangod ang mga implementasyon sang bulig sang ahensya ang kun kis-a ginapatigayon by sector ukon classification bangod sa limitado nga budget.
Apang pasalig sini nga tanan nga transport sector ang ila nga gina-ulikid.
Welcome man ini sa pagbatun sang mga suhestyon gikan sa mga drivers ukon operators.
Apang hingyo sini nga apisar may pagpamatok, magsunod gihapon sa ginapatuman nga mandato.
