Indi kumpormi ang grupo sang traditional jeepney driver kag operators sa ciudad sang Bacolod sa pagpasaka sang plete bangod wala man sang pagsaka sa sweldo.
Sa interview sang Bombo Radyo Bacolod kay Kabacod Negros Transport Coalition (KNETCO) President lilian Sembrano, nagapati ini nga gin-aprubahan ang fare hike petition bangod sa pressure sa natalana nga nationwide transport strike.
Samtang apisar gin-anunsyar na nga may rollback sa presyo sang gatong sa Martes, wala nila nalipatan ang pahayag sadto sang Department of Energy nga tubtob sa Disyembre pa ang pagsaka sang presyo sang gatong.
Aminado si Sembrano nga makadugang ang fare hike sa ila kita, apang ini ang kaangay sang limos lamang.
Ang ila nga panawagan amo ang paluson ang excise tax kag value added tax sa produktong petrolyo.
Panawagan nila nga mabalik sa P55 ang presyo sang Diesel kaangay sa pre-pandemic nga presyo sang gatong.
Suno kay Sembrano, makaluluoy lamang ang mga commuters sa pagsaka sang pletehan samtang wala man ginapasakaan ang ila nga sweldo.
Pahanumdom sini nga gindiffer sang Marso ang fare hike petition bangod wala nadayun ang wage increase.
Gani nagalaom ini nga sa pagpatuman sang karun nga saka sa pletehan, aprubahan naman ang pagpasaka sang sweldo sang mga empleyado.
Pinaagi sini malipay ang mga drivers, malipay man ang mga workers.
