Dayunon sang transport group nga Bacolod Alliance of Commuters, Operators, and Drivers (BACOD Manibela) ang pagpatigayon sang transport strike bwas sa Lunes.
Sa interview sang Bombo Radyo BACOD Manibela President Rudy Catedral, alas-10:00 sang aga tubtob alas-12:00 sang udto sa Lunes, magapatigayon sila sang untat-biyahe kag sila ang magatipon sa Araneta St sa may replika sang Bacolod New Government Center.
Matapos sini, mabalik sila gilayon sa pagbiyahe.
Suno diri, madamo sang ila mga miyembro sa Sur nga bahin sang Negros ang maga-upod sa untat-biyahe.
Kadungan sini, ginpahayag ni Catedral, magahinun-anon man siya kay Bacolod City Mayor Greg Gasataya nahanungod sa mga ayuda nga mahimo mahatag sa ila nga suno sa iya, halin mismo sa Local Goverment Unit (LGU).
Nagapati man ini nga mangita gid sang pamaagi ang alkalde nga sila nga mga transport group ang mahatagan sang bulig.
Suno diri, lakip sa ila mangin singgitan amo ang pagkakas sang excise tax, Value Added Tax (VAT) kag pagsuspend sang oil deregulation law kasubong man ang fuel discount sa mga gasolinahan.
Sa pihak sini, ginpasiguro sang BACOD Manibela President nga indi sila makahatag sang huol sa dalanon kag idul-ong nila ang mga pasahero sa aga.
