Gintawag sang transport leader nga ‘perwisyo’ ang announcement sang grupo sang mga unconsolidated traditional jeepneys nga pagpatigayon sang transport strike, apang hinali lamang nga ginbawi.
Sa interview sang Bombo Radyo Bacolod kay Junjun Asis, Secretary-General sang Sentrong Samahan ng mga Tsuper at Operators Negros (SSTONE), ginhatagan lamang sang mga transport group ang mga commuters, kun sa diin may mga eskwelahan nga nagsuspend sang klase, kag may mga trabahante nga wala nalang nagdayun sa trabaho.
Madumduman nga sa announcement sang Bacolod Alliance for Commuters Operators and Drivers Negros Island (BACODNI-MANIBELA), United Drivers and Operators Council (UNDOC-PISTON), kag Kabacod Negros Transport Coalition (KNETCO) nga sila ang magapatigayon sang tatlo ka adlaw nga transport strike halin alas-6:00 sang aga tubtob alas-6:00 sang gab-i, Lunes tubtob Miyerkules.
Bangod sini, may mga eskwelahan nga nagdeklarar sang suspensyon sang face-to-face classes bilang pangaman, apang hinali lamang ginbawi ang pronouncement, kag nagpatigayon na lamang sang tatlo ka oras nga rally-protest alas-10:00 sang aga tubtob alas-12:00 sang udto.
Suno kay Asis, indi man makaparalyze bisan mag-untat byahe ang mga ini bangod kapin 300 ukon 7 percent lamang sang transport population sa Bacolod City ang mga unconsolidated.
Pasalig sini nga sila nga mga consolidated tranditional jeepney units, upod sa Federation of Bacolod City Drivers Association (FEBACDA) ang may masobra 1,360 units nga padayun nga makabyahe.
Suno kay Asis, ‘vocal, pwerte pasugiron, kag pwerte ka tikalon’ lamang ang tatlo ka grupo, nga ginapakita lamang nga kaangay nga sila ang dako nga grupo.
Suno diri, ang SSTONE ang wala nagpanawagan sang transport strike bangod sa kadugay sini sa transport industry, nahangpan nila nga ini ang nagahatag lamang sang perwisyo sa pumuluyo.
Panawagan niya na lamang sa mga ini nga kun magbag-o sang desisyson, dapat nga magpahibalo sang temprano.
