Indi magbaton ang Alkalde sa ciudad sang Bacolod kun kulang ang proyekto sang Tourism Infrastructure and Enterprise Zone Authority (TIEZA).
Nahibaluan nga ang proyekto sang TIEZA nga re-development sa Bacolod City Government Center (BCGC) Fountain kag Public Plaza ang lakip sa mangin festival site sa nagahilapit nga Masskara Festival 2026.
Madumduman man nga nagpasalig ang kumpanya sa ciudad nga matapos ang proyekto sini nga bulan sang Setyembre.
Suno kay Bacolod City Mayor Greg Gasataya, sang tinalikdan nga Biyernes, naghinun-anon siya sa kontraktor sang TIEZA nahanungod sa latest update sang proyekto.
Dugang pa sang Alkalde, may nagbisita man nga inspectors sang TIEZA agud itsekyar ang re-development sang mga proyekto.
Ginklaro sini nga indi siya magbaton kun kulang ang proyekto bangud mahimo ini nga makatuga sang problema bangud may agreement na sa tunga sang ciudad kag sang kumpanya.
Suno diri, iban sa mga board-up sa plaza ang pwede na makakas apang ang iban naman ang indi pa, bangud sa kahangawa nga magkalaguba.
Sa pihak sini, ginpahayag ni Mayor Greg nga nagabulig ang ciudad sa kun ano ang ila mahimo nga ma-ubra lakip na diri ang pagpanglimpyo kag pagkay-o sa indi na kabahin sang budget sang TIEZA.
