Dismayado ang Akalde sa ciudad sang Bacolod sa re-development project sang Tourism Infrastructure and Enterprise Zone Authority (TIEZA) sa Bacolod City Public Plaza.
Nahibaluan nga ang amo nga proyekto lakip na ang New Government Center Fountain ang may P300 million budget.
Kinahanglan ini nga ma-turnover sa Setyembre apang wala pa sa gihapon ini natapos.
Subong nga Oktubre 1, maga-umpisa na ang Masskara Festival 2026.
Suno kay Bacolod City Mayor Greg Gasataya, matapos ang pagpatigayon sang inspection upod ang City Engineers Office sa Public Plaza, madamo siya sang nakita nga kinahanglan pa nga pagakay-uhon kag ilisan.
Lakip na diri ang mga leakages sa mga dancing fountain, drainage failures, surface pooling, unsecured nozzles, absent float valves, nonfunctional lighting, unfinished installations, protruding deteriorated manholes, kag undemonstrated control sequences.
Suno sa Alklade, indi niya masarangan nga lantawon ang sitwasyon sa plaza ilabi na ang landscape.
Pahayag sini, rason sang kontraktor sang TIEZA nga indi na parte sang ila proyekto ang landscaping sa plaza.
Apang suno kay Mayor Greg, bisan indi na nila ini responsibilidad, kinahanglan nga mabalik sang TIEZA ang hitsura sang plaza.
Bangud sini, nagpadala kahapon ang Alkalde sang sulat kay TIEZA Chief Operating Officer Mark Lapid nga nagahingyo sang gilayon nga corrective measures sa proyekto.
Kasunod sini, nagbiyahe man gilayon kagab-i ang personnel sang TIEZA kag nakig-istorya kag nangayo sang pasaylo sa Alkalde.
Pahayag sini, indi niya luyag mangin “crybaby”, gani ginmando niya sa City Engineers nga magbulig sa pagpanglimyo agud ma-improve ang sitwasyon sa plaza.
Nagpaandam naman si Mayor Greg nga kun indi pagakay-uhon sang TIEZA ang proyekto indi niya indi pagbatunon kag sila ang mapapanabat.
