Ginpanindugan ni Bacolod City Councilor Al Victor Espino nga pasabton ang dapat manabat nahanungod sa re-development project sang Tourism Infrastructure and Enterprise Zone Authority (TIEZA) sa Bacolod Public Plaza.
Sa interview sang Bombo Radyo kay Espino, aminado siya nga indi gid matago ang pagkadismaya sa sitwasyon sang plaza bangud mataas ang expectation sang ciudad sa resulta sang proyekto.
Ginalantaw man sini nga ang problema kun halin sa national ang kontraktor kag maabot sa lokal, ginansya lamang ang ginalantaw sa kontrata.
Sa pihak sini, ginpahayag ni Espino nga indi na niya luyag mamasol kag dapat ang ubrahon mangita sa kun ano dapat ang himuon nga tikang.
Ginklaro sini nga wala siya sang kwestyon sa mga lightings sa plaza apang ginalantaw sini nga lain ang ginpresent sang kumpanya sa kontrata kag sa reyalidad.
Kahapon, kaupod sini nga personal nga nagbisita si Congressman Albee Benitez kag Mayor Greg Gasataya agud itskeyar ang sitwasyon sang plaza.
Nagapati si Espino nga mapangitaan sang pamaagi ni Benitez nga magbulig kag mapanami ang plaza.
