Nagpatigayon sang pagprotesta ang pila ka mga grupo sa gwa sang hotel sa Lacson Street, Bacolod City kun sa diin ginapatigayon ang Joint Congressional Hearing angot sa Visayas Power Crisis.
Nagdangat sa isa ka gatos ang mga nag-upod sa pagprotesta nga ginalakipan sang Bagong Alyansa Makabayan, Philippine Movement for Climate Justice, Bukluran ng Manggagawang Pilipino, Partido Lakas ng Masa, Sanlakas Power for People Coalition, kag Kongreso ng Pagkakaisa ng mga Maralita ng Lungsod.
Sa interview sang Bombo Radyo Bacolod kay Bagong Alyansa Makabayan Spokesperson Noli Rosales, dismayado ang mga ini bangod wala man lang ginpalab-ot sang mga kongresista sa publiko nga may patigayunon nga public hearing.
Suno diri, luyag kuntani nga makigbahin sang mga mangunguma agud makapamangkot man kun ngaa dugay-dugay may nagakatabo nga brownout kag luyag nila nga maathagan.
Apang ginabatikos nila nga ginpatigayon ang public hearing sa hotel nga suno sa iya mga nakabarong kag mga negosyante lamang ang makasulod.
Luyag kuntani nila nga sa mga public gym ukon diin paman nga mas malapad nga area ginpatigayon ang public hearing agud maka-upod ang mga electric consumers.
Samtang sa ila pagrally, bitbit man nila ang mga placards nga may nanarisari nga panawagan.
Kalakip diri ang panawagan sa pagpanaog sa pwesto ni Energy Secretary Sharon Garin.
Suno kay Rosales, si Garin ang wala sang pulos sa Department of Energy kag ini ang nagaserbe na lamang nga spokesperson sang mga dalagkuan nga power industry players.
Ginapanawagan man nila ang pagbasura sa Republic Act No. 9136 ukon EPIRA Law, nga nagpahanugot sa pagbakal sang mga pribado nga negosyo sa electricity kag water distribution.
Panindugan nila nga dapat mabalik sa gobyerno ang operasyon sang mga nasambit nga mga public utilities.
Ini bangod kun gobyerno ang nagakapot sa operasyon, mahimo pa nga ma-estoryahan kag mapunggan ang pagsaka sang presyo.
Indi kaangay kun mga pribado nga negosyo, nga profit-oriented, kag nagasukot sang mahal nga generation charges, nga nagapasaka pagid sa balayran sa kuryente.
Samtang isa man sa kwestyon nila ang madamo na nga mga solar energy farms sa Negros, apang wala man nagakapuslan sang pumuluyo.
