Kadungan sang ila nga pagdaog bilang Best Film sa Agrarian Reform Beneficiaries (ARB) Category sang PelikulAgraryo sang Department of Agrarian Reform Negros Island Region, nalipay man ang direktor sang pelikula nga nahatagan nila sang hustisya ang matuod nga istorya sa kabuhi sang ARB sa banwa sang La Castellana.
Ang “Kapait sang Tubo” ang nagdaog man sang major awards nga ginalakipan sang Best Screenplay, Best Editing, Best Cinematography, Best Actor para kay Phobe Jhon Aungon, kag Best Director para kay Mhika Jhella Cenizal.
Sa interview sang Bombo Radyo Bacolod kay Cenizal, third year MassComm student sa University of Negros Occidental-Recoletos, ang istorya sang “Kapait sang Tubo” ang nabase sa matuod nga istorya sang ARBs sa La Castellana nga sanday Jimmy kag Nora Mameng.
Suno kay Cenizal, ginapakita sang pelikula ang kapait nga ginaagyan sang mga ARBs antes kag pagkatapos nga na-award sa ila ang duta halin sa landlord, paagi sa Comprehensive Agrarian Reform Program.
Nagtinir sila sang duha ka adlaw sa La Castellana agud ishoot ang tanan nga scenes nga yara sa katubuhan, samtang ang iban naman nga scenes ang ginshoot sa Capitol kag sa iban nga bahin sang Bacolod.
Nalipay si Cenizal sa achievement sang ila pelikula apang nasubuan man ini sa kamatuoran nga may yara sang kabuhi nga nagakabutang sa peligro bangud lamang sa duta.
Nagalaom siya nga mahatagan sang gobyerno sang seguridad ang mga ARBs kag mga mangunguma nga may dako nga papel sa ekonomiya.
Ang nasambit nga pelikula ang magarepresentar sang DAR NIR sa bilog nga pungsod sa bulan sang Nobyembre.
