Patay ang 60 anyos nga lalaki matapos ginpaulanan sang bala sang mga armado nga mga tawo sa Purok 1, Barangay Yao-yao, Cauayan, Negros Occidental, Domingo sang kaagahon, Oktubre 4.
Ginkilala ang biktima kay alyas Atan, 60 anyos, balo, mangunguma kag residente sang nasambit nga lugar.
Sa interview sang Bombo Radyo Bacolod kay Police Lt. Col. Norberto Barniso, Chief of Police sang Cauayan Municipal Police Station, ginatumod pa ang motibo sa pagtiro patay sa biktima.
Suno kay Barniso, ang biktima ang nagwa sa likod sang iya balay agud nga magpanamog sang baboy.
Wala man sang nakakita sang pagtiro-patay sa biktima bangud ang mga kabataan sini ang nagpanago matapos nga makabati sang lupok sang armas-luthang
Dugang pa sini, ginbantayan sang wala matumod nga mga suspetsado kag gintiro sang makapila ka beses.
Suno sa hepe posible nga long firearms ang gingamit sa pagpatay sa biktima bangud ang narekober sang mga kapulisan sa crime scene ang basiyo tanan sang 5.56mm ukon bala sang M16 rifle.
Ang biktima ang may police record kun sa diin gindakop ini sang January 2024 paagi sa warrant of arrest matapos ginpasakaan sang kaso nga act of lasciviousness.
Gin-areglo sini ang nagpapasaka sang kaso gani nakagwa ini.
Padayon pa ang imbestigasyon sang mga kapulisan agud matumod ang motibo kag may kahimuan sa krimen.
