Gin-aresto sang FBI ang isa ka California real estate agent sa Los Angeles airport nga magabiya kuntani sa Estados Unidos padulong sa China, matapos ini gin-akusaran nga naga-spy sa pamilya sang Presidente sang Taiwan, sa direktiba sang China.
Santo sa FBI, si Wanying Zhang, nga nagpakilala bilang Heather, ang naga-monitor sa bata kag pamilya sang Taiwanese president sang nagligad nga tuig.
Si Zhang, 34-anyos, ang gin-aresto sang Dominggo sa nasambit nga airport bilang unregistered agent sang China, suno kay First Assistant U.S. Attorney Bill Essayli.
Santo sa federal criminal complaint, si Zhang ang nagakuha sang mga litrato kag video sang iya mga target kag nagpadala sang license plate information sa Chinese officials.
Ang ini nga kaso ang pina-latest sa serye sang pagtapna sang Justice Department sa mga patago nga ahente nga nagatrabaho para sa interes sang Beijing sa teritoryo sang Amerika.
Wala pa sang komento ang Chinese Embassy sa Estados Unidos.
Gikumpirmar naman sang Presidential office sang Taiwan nga gin-target ang pamilya ni President Lai Ching-te.
Ini ang hugot nila nga ginkondenar kag ginlaragway bilang “transnational repression.”
Ang Taiwan kag China ang nagbulag matapos ang civil war sang 1949, apang gina-claim sang Beijing nga ang isla kabahin sang ila nga teritoryo.
Suno kay President Lai, wala sang kinamatarong ang China nga i-representa ang Taiwan.
