Patay na sang nasapwan ang isa ka persona sa Hacienda Cambao, Barangay 12, Victorias City, Negros Occidental, kahapon sang aga, Oktubre 6.
Sa interview sang Bombo Radyo Bacolod kay Barangay Kagawad Richard Sy sang Barangay 12, Victorias City, ang bangkay ang nasapwan sang isa ka residente sa nasambit nga banwa.
Suno kay Sy, ginalantaw sini nga ginguyod ang biktima pasulod sa kampo sang tubo bangud nga sa nakita nila nga dugo sa nasambit nga lugar.
Suno diri, sa ulo ang pilas sang biktima kag ini pa matumod kun ano ang gintunaan sang samad sini.
Ginalantaw sang Barangay Kagawad nga sang kaagahon lang napatay ang biktima bangud preska pa ang dugo sang ini ang nasapwan.
Ang lugar kun sa diin nasapwan ang bangkay ang malayo sa mga pamalay.
Ang nasapwan nga bangkay ang isa ka lalaki, medium built kag madamo sang tattoo.
Suno kay Sy, ang isa sa mga tattoo sang bangkay ang makita sa iya dughan kag ini ang pangalan nga Richard.
Ang nasambit nga lalaki ang nagasuksok sang itom nga t-shirt kag gray nga shorts.
Sa karun nagapadayon ang imbestigasyon sang mga kapulisan agud matumod ang motibo sa pagpatay kasubong man ang suspetsado sa krimen.
Ginpahayag sang Chief Tanod sang Barangay 12, Victorias City nga mahimo ginguyod pasulod sang kampo sang tubo ang bangkay sang lalaki antes ini nasapwan.
Sa interview sang Bombo Radyo Bacolod kay Ronald Leanio, nakabaton sila sang impormasyon nga may nasapwan nga bangkay sa lugar gani gilayon man sila nga nagresponder.
Suno kay Leanio mahimo nga ginguyod ang bangkay antes ini nakita nga nagapaligo sang kaugalingon nga dugo, duha ka dupa halin sa dalan.
Suno sa Chief Tanod, mahimo nga wala lamang dugay sang ginpatay kag ginbilin ang bangkay.
